فاطمه المسمار اوجر بيها...قوه من تدعي تشيل ايديها

موجعة و ذايب قلبها امن الوجع...من تقول آخ إلها و اتحسه انقطع
الباب ما مقفول جان من اندفع...انجان ثقل العصرة خف اعليها 
 
النذل قالوا له و سمع ترس الأذن...فاطمه بالدار جاوبهم و إن
طاحت ووياها طاح أول غصن...محسن المطروح عد رجليها

صعبة يا ناس اليرد بابه عليه...اشحال لو جانت غفل شيسوي بيه
اليحترق قدامه داره اتموت ايديه...اشحال أهل الدار جانوا بيها

الضلع يقتل آخ يا كسر الضلع...طول ما تنتفس اتظل تنوجع
اتشيل جف و جف تخليه عالضلع...حين توقف تندعي الباريها

روعوها و الضلع منها انكسر...جن عدو ما جنها بت سيد البشر
و خمس أصابع تركن بخدها أثر...اتنوح و بسوطه النذل يوليها

ما تقول آخ خافن حيدره...و تدري كسر الضلع كاسر خاطره
و بقت عبرتها بقلبها امكسره...اتخاف يتفطر قلب واليها

جاليش محد شالته الغيرة و هتف...و صاح حيهم وينكم يهل السلف
كلها تتشمت بحيدر للأسف...احترق داره و محد ايطفيها

عينك بعين الله يا راعي الشيم...اليوم مسمار بضلع باجر سهم
الباب ما يطفه و لا يطفه الخيم...و لا يرد راعي الخدر حاميها

الخيم ما تطفه و لا يبرد جرح...و إلا غير الثار بلسم ما يصح
الراية ما ترتفع لا ينزل رمح...لحد ما مهديكم ايصفيها