بعدج ما ظل ماي بعيني جا غسلتج بالدمع...أدري الماي يأذي اضلوعج يالكسروا منج ضلع
أيام عمرج تنختم...بالماي ضلعج ينلجم
أدري الماي يأذي اضلوعج...يالكسروا منج ضلع
جايب ادموعي و اجيتج فاطمه و جاي أعتذر لج...المغتسل وضح لي كلشي و بيه شفت مكسور ضلعج
الماي من درته صرختي و صحتي آه بإذني سمعتج...بهيدة عالمكسور ضلعه أعتذر يمكن لجمتج
من غسلتج صحتي بحرقه حيدر بهداي انوجع...خاف الوادم تسمع صوتي و صوت الميت ينسمع
شمات كل هاي الزلم...بالماي ضلعج ينلجم
تستحين و انتي ميتة ارسومي متغيرات چني...وجهج امغطيته مني فاطمه مستحية مني
ثاري خدج صاير أزرق الهالسبب تخفينه عني...امطفية باب الدار قولي ارماد بجفوفج هدني
لتغطين اخدوج فدوه زعلانة و ليش الزعل...خدج أحمر من السطره لو أحمر من الخجل
خجلان خدج بيه رسم...بالماي ضلعج ينلجم
يا هدية الله المحمد و الوحي امدنق يجيها...و جان أبوها ايقلها يُمه و يستلذ جان بحجيها
اعيونج امراية محمد وجهه جان ايشوفه بيها...هسه شو مقلوبة حمره يا هو مد ايده عليها
دني اعيونج يا بت طاها ما مخلوقات البجي...لو غمضتي اتسولف عينج من جفنج يطلع حجي
مسمار بعيونج حلم...بالماي ضلعج ينلجم
لاحظت من جاي أغسلج شو عالدار التفتي...اسمعتي زينب يُمه صاحت ميته و اعيونج فتحتي
صحتي لا تبجين يُمه سكتي اخوانج و اسكتي...صيري أم بيت ابدالي و صيري أم لخوانج انتي
ضمي ادموعج زينب صاحت باجر حيدر ينطبر...حسين بحاجة دمعج يُمه من يقطع راسه الشمر
عالقاع يبقه ابلا هدم...بالماي ضلعج ينلجم
حسرت الباب بدليلي و خدي بدموعي انجوه...ابكل نفس مسمار أحسن يدخل بريتي الهوه
الماي يلجم ضلعي قالت فدوه غسلني بضوه...الله خالقني اعله مودج كون موتتنه سوه
خالقني الله الخاطر عينج وشمحله اوياج العمر...وحشة الدار اخلاف اعيونج خل ننام بنفس القبر
لحظات لازم تنحسم...بالماي ضلعج ينلجم
