كلما أسهر الليل و أنظر للگمر...أذكر عمي عباس يم شاطي النهر
لازم تنحمل...راية بو الفضل
أنا المهدي أنا الجزعت سيوفه...يمته الثار تتهيأ ظروفه
أساهر و الگمر كلما أشوفه...الگمر هاشم تظل عيني ذروفه
هذا أول گمر گطعوا جفوفه...و عله الشاطي بعمد أصبح خسوفه
يا يوم أسرج الخيل و أظهر و أنتفض...من اغيابي مليت بسما أعترض
للرب تمتثل...راية بو الفضل
أنا براية بطل صار اعتزازي...تراگقنه و تبادلنه التعازي
أرد بيها و اطب عالدنيه غازي...و ترف خضره بعزم فارس حجازي
اليظن الثار تعبيراً مجازي...أخيّب ظنّه من اثأر و أجازي
الله الخصني بالثار بِسم المنتقم...يعلم بيه مولاي قد هذا الاسم
تعله و ما تذل...راية بو الفضل
بوكت ثاري إذا صوتي يدوّي...علو الرايه يتنومس من عِلوّي
أُميّه ما تعكر صافي جوّي...أشبّع سيفي من دمها او أروّي
الخطر يجدح من اعيوني او يضوّي...لجل الطف قليل اشما أسوّي
أكثر من ألف عام أتنفس جمر...يمكن ساعة الثار يرتاح الصدر
بالهم تشتعل...راية بو الفضل
بقت هالرايه مطوّيه و حزينه...تحن العمي لاجن عمّي وينه
و إذا راعيها گطعوا له ايدينه...أعوضها بيديه و أگر عينه
عمود الراية كله امجرحينه...استلم موضع البيه قبضت يمينه
حته بگطعت ايديه تنهد ما رضه...و اعله الرايه يمناه ظلت قابضه
يا رايه مثل...راية بو الفضل
بمحرم رايته أفرشها حسره...أشم بيها و أحس لا زال عطره
أثر دم عمي عالرايه أنظره...مو بس دم أشوف ادموع حمره
أميز زين و أعرف قطره قطره...هاي ادموع شخص انكسر ظهره
ما أغلط بالحسين أعرف مدمعه...هاي ادموعه من صاح آه يالمشرعه
وين اليكتفل...راية بو الفضل
إذا گلبي اعله عمي بناره يلهب...الله ايعين گلب الحره زينب
أنا ابعيد الزمن و بحرگه أنحب...هيه من المصارع جانت أقرب
عجيبة خدر لاجن صار الاعجب...من الهزل تطيح و هيه تركب
ما أنساها و اتصيح خويه المعذره...ابلا شورك يعباس أمشي اميسره
شهدت عالهزل...راية بو الفضل
عله اجفوف القمر عيني بجيها...ثار أرباتعش معصوم بيها
باجر بالحشر نسأل عليها...اجفوف الغيره ليش امقطعيها
و تجي الزهره و ينوح العرش ليها...البعض حسباله محسن بين ايديها
ترفع لله جفين و اتنادي بألم...احكم لبني عباس يا أعدل حكم
باجر تبتهل...راية بو الفضل
