تسأل وين...عبدالله
نور العين...عبدالله
خويه حسين...عبدالله
بيدك ذبحوه...و عنك بعدوه

خويه فهمني اشجراله من رجع لمن خذيته...أمه تسألني اعله بنها و آنا بيدك سلميته
ليش بيدك ما أشوفه ضامي طفلك لو رميته
خويه اوليدي شو ما شفته...بيدك يحسين
قلي اشصاير و اشرح قصته...جا طفلك وين
لو مجروح...خبرني
لو مذبوح...خبرني
بعد الروح..يخبرني
يعطش عافوه...و عنك بعدوه

آني أول مرة أشوفك هيج تتغير يغالي...من أسألك عن رضيعك شفت دمعاتك تلالي
خويه ما يصلح قلت لك يبقه مهد الطفل خالي
وجهك جا ليش اتغير لونه...عبدالله اشبيه
راجع وحدك شو من دونه...وين امخليه
قلي اشصار...عن طفلك
قلبك نار...عن طفلك
شو محتار...عن طفلك
بالدم فطموه...و عنك بعدوه

خويه زينب من خذيته يابس إلسانه اعله شفته...شنهو ذنب الطفل يعطش صحت و بجفي رفعته
من كثر ما جبده ضامي لو بجه يشرب دمعته
يفتح عينه و أقره البيها...جن يحجي وياي
ردت إقبالك روحي أفديها...و ما ردت الماي
بين اعداك...ما عوفه
موتي اوياك...ما عوفه
و أترجاك...ما أعوفه
طفلك غدروه...و عنك بعدوه

حرمله الملعون سدد نبلته و صابه بوريده...و استحيت من أمه يختي للمهد مذبوح أعيده
قلبي يا زينب تقطع قطع شفته اقماطه بيده
من اقماطه طلع إيده...حاجاني بصوت
لجل حسين الموت انريده...أهلاً بالموت
يحجي اوياي...يا بويه
يا وفاي...يا بويه
ليش الماي...يا بويه
منك منعوه...و عنك بعدوه

اهوايه مرتني مواقف صعبة يوم الغاضرية...لجن يا زينب ذبحني و أشد موقف مر عليه
طفلي يشرب ماي جبته و ينذبح ما بين ايديه
أصعب موقف هذا ايمرني...طف الأحزان
آنا حسين و يعطش ابني...و ذبحوه عطشان
ما رحموك...يوليدي
من ذبحوك...يوليدي
و العادوك...يوليدي
جدك عادوه...و عنك بعدوه

من شمس عبدالله غابت روحي غابت وي مغيبه...من شفت مقطوع نحره الصبر خويه امنين أجيبه
قام يشرب دم وريده هاي أشد من المصيبه
حسباله الدم ما يتبده...و يشرب بالماي
شنهو الأعظم من هالشدة...و أكبر من هاي
نحره يصيح...يا زينب
بالتسبيح...يا زينب
دمعه ايسيح...يا زينب
صاحت خانوه...و عنك بعدوه

سمعت أم ايموت ابنها صاحت ابني اليوم أريده...صعبه عالأم صاحت إلهم بعد ابنها اتظل وحيده
لو تردونه إليه لو أروح اوياه شهيدة
صاحت يبني اشلون ايودعك...حضن الرباك
لو ترجع لي لو أرجع لك...لو أموت اوياك
يا منحور...آه يبني
يا مغدور...آه يبني
و بعاشور...آه يبني
عمرك سلبوه...و عنك بعدوه