بقيعك جنة الله اعله الأرض
صح ضريح ابلا منارة ابلايه قبة و لا صحن
لكن ابعين الموالي أحله من جنة عدن
بأبي أنت و أمي يا حبيبي يالحسن
للأسف يبن المدينة عايش ابغربة وطن
يغالي إنت ساكن بالنبض
مرقدك نفس القداسة هوه و الكعبة سوه
من هوت قبة ضريحك يعني بيت الله هوه
يا إمام النور صعبة منزلك ما بيه ضوه
الهوه لو طاف ابضريحك تنزل ادموع الهوه
دمعتي ابخدي صلت لك فرض
عايش إحساسك أعرفك موقفك موقف صعب
ابلحدك و أدريك تخجل زايرك لمن يطب
يقصد القصر الضيافة اشلون يقعد عالترب
يفتح اعيون البصيرة ايشاهدك دمعك يصب
ترابك و المشاعر تنتفض
محتمل كل نور يطفي نورك الما ينطفي
حته لو ما نصل يمك بس نشوفك نكتفي
يبن أبو اتراب و ترابك بيه لغز كلش خفي
أصله من النجف يعني ايظل بقيعك نجفي
حقيقة ما يهمني اليعترض
بعد أعوام المصابك شفنه هم ما ينحمل
يوم سابع من صفر مر اعله زينب عالهزل
اتوجهت صوب البقيع و دمعة الغرب تهل
يالحسن صاحت تعال خلص إيدي من الحبل
مصيبة بالمدامع تنعرض
لا بد اتعود الليالي نسمع المهدي ظهر
و الفته ابهدم المراقد ينكسر منه الظهر
يا لثارات البقيع ايصيح صوت المنتظر
يا لثارات السبايه يا لثارات النحر
ابظهوره دولة الحق تنتهض
