أضف الموضوع
الشاعر كرار حسين الكربلائي - 20/10/2015م - 12:38 ص | عدد القراء: 10599
كل حرمه إذا جان الإخو يمها...يا با الفضل كل الناس تحشمها
معروفه الإخت لو جان إلها إخوان...الغريب يهابها و بالدهر ما تنهان
منو يصدقها زينب توقف بديوان...مجتوفه ابحبل و ايزيد يشتمها
دمعة عتب بعيوني يراعي الجود...شفت موقف و يا ريتك جنت موجود
اشفاف حسين قاموا يضربوها بعود...اشفاف الجان جدي الهادي يلثمها
خليني أعاتب خويه خليني...و أسولف لك بعد موقف مأذيني
يا عباس إجه واحد سطر عيني...و صارت عين زينب مثل عين أمها
أسولف بعد لو يا با الفضل كافي...لو أقل لك السوط اشسوه بجتافي
لو أقل لك لهسه يابسه اشفافي...لو أقلك بعد إختك اشألمها
الله ايعين قلبي اشكثر آلامه...أخاف أحجي يخويه و ألجم الهامه
واحد قال أريد اسكينه خِدامه...سكينه الوحي بقدسيته يخدمها
برض الشام حالي صعب تفسيره...قعدونه ابخرابه و حيرتي حيره
الشمس حرقت وجه إختك يبو الغيره...الأخوها انت عجيبه الدهر يهضمها
يا با الفضل طحنه ابين ناس أرجاس...رقيه أحاه رقيه شيبت لي الراس
ماتت فوق راس حسين يا عباس...هوه الموت أخذها و هوه يتمها |
|
