أضف الموضوع
الشاعر واثق العيساوي - 20/12/2014م - 5:11 م | عدد القراء: 5437
أشتكيلك ...من رحيلك
و آني للموت أنتظر ...و أحسب ثواني
و بغيابك ...ظل عتابك
دمعه طاحت عالقبر ...تحجي بمكاني
أشتكي من الزمن ...وشسوه وياي
ليلي بعيوني سكن... يالوجهك ادواي
رحت و ادموعي جرن ...و امكدره دنياي
حزني يالعفت الوطن ...وي قلبي وفّاي
حقي أعاتب... قلبي ذايب
ويه كل دقه... يقلك رد عليه
بويه إرجع... أدري تسمع
صوتي بيه حرقه ...و يسولف كل شي بيه
روح بس عوف القلب... لا يمشي وياك
بابي وي قبرك درب... بدموعي حاجاك
اوجوهم كلهم غرب ...و بلحظه تنساك
العمردونك صعب... يا ساعه ألقاك
واعدتني ...يالعفتني
قلت لي من بعدي شهيده... و آنا أتانيك
و انتظرته... يومي ردته
عمري عقبك ما أريده ...حته أعاني
حسرتي اتكسر الضلع ...و بقلبي نارين
الحسن ويه الدمع ...واوليدي الحسين
عبره صوتي المنفجع... و ادموعه بالعين
وينه جدي و أستمع ...وين النبي وين
من إجوني... عذّبوني
ذوله أعز أحباب... يا بويه بحياتك
شرد أقلهم... يالعفتهم
عينهم عالباب... يالغبت بمماتك
من يأذن حيدره ...تنزل دمعته
يمر اسمك و أعذره... تلهب حسرته
نار قلبه اموجره ...يا من تركته
ناصرك يالتنصره ...ابفقدك فجعته
جن خصومك... ذوله قومك
جابوا إحبال الغدر ...جتفوا وزيرك
بويه دمعي... و هذا ضلعي
و محسن و بابي جمر ...أصبح مصيرك
ليلي بغيابك حزن... لا ما أنامه
و قعدت ببابك تون... هاي اليتامه
الكساء اللي يحن ...و جنح الحمامه
آه يا ليلي اليجن ...يذبح ظلامه
و إنتظرتك ...طيفي ردتك
تمسح اجروحي ...و تنشف لي دمعتي
ما لقيتك... وحشه بيتك
يرتفع نوحي... و أناديك بعبرتي |
|
